बायाँ हात चलाउनेको दिमाग अर्कै तरिकाले विकसित हुन्छ

एजेन्सी । दाहिनेको सट्टा प्रायः सबै काम बायाँले गर्नेहरु आमाको पेटमा हुँदादेखि नै छुट्टै किसिमले विकसित हुने गरेको पहिलोपटक वैज्ञानिक अनुसन्धानले पत्ता लगाएको छ ।

यसमा अनुसन्धानकर्ताहरुले चारवटा वंशाणुगत क्षेत्रको खोजी गरेका हुन् जसकै कारण मान्छे बायाँ हुने गरेको बताइएको छ । यसैले दाहिनेको तुलनामा बायाँ चलाउनेहरुको भाषागत् क्षमता राम्रो हुने गरेको पनि अनुसन्धानको निष्कर्ष छ ।

अध्ययनमा ‘लेफ्ट ह्यान्डेड’ हरुमा कुनै छुट्टै जिन नहुने गरेको पाइए पनि उनीहरुको दिमागी विकास भने आमाको गर्भमै फरक तरिकाले हुने गरेको पत्ता लागेको हो । १० प्रतिशत मानव जनसङ्ख्याले मात्र दैनिक कामहरु गर्न बायाँ हातको प्रयोग गर्छन् । यसरी बायाँ हात प्रयोग गर्नेहरुको मष्तिस्कको संरचनामा भिन्नता भएकाले पनि अधिकांश दाहिने हात चलाउने मानिसको तुलनामा उनीहरुको मौखिक शीप राम्रो हुने गरेको बताइएको छ ।

युनिभर्सिटी अफ अक्सफोर्डका वैज्ञानिकहरुले गरेको यस नयाँ अनुसन्धानबारे जर्नल ‘ब्रेन’ मा प्रकाशित गरिएको छ जसले पहिलोपटक दाहिने र बायाँबीच छुट्टै जेनेटिक परिवर्तन हुने कुराको पहिचान गरेको हो । यसमा उच्चतम मौखिक क्षमता र बायाँ हातबीच सम्भावित सम्बन्ध रहेको देखिएको अध्ययनकर्ता अकिरा वीबर्ग बताउँछन् ।

यस्तोमा बायाँ हात चलाउनेहरु बोलीको विषयमा फाइदामा रहेको थाहा हुनुले भविष्यमा अर्को अनुसन्धानको पनि बाटो खुलाएको उनको भनाइ छ । तर पनि यो सबै देब्रेहरुमा लागु नहुन पनि सक्ने उक्त प्रकाशनमा उल्लेख गरिएको छ । बेलायतको मेडिकल रिसर्च काउन्सिल र वेल्कम च्यारिटीको आर्थिक सहयोगमा सञ्चालन गरिएको यो अध्ययनले चार लाख मानिसको डीएनए परीक्षण गरेको थियो ।

जसमध्ये ३८ हजार तीन सय ३२ बायाँ हात चलाउँछन् । यसरी लेफ्टीहरुमा हुने चार छुट्टै जेनेटिक क्षेत्रहरुमध्ये तीनवटा प्रोटिनसँग सम्बन्धि रहेको बताइएको छ जसले हाम्रो मष्तिस्कको संरचना र विकासलाई प्रभाव पार्ने गर्दछ । अझ विशेष रुपमा ती प्रोटिन माइक्रोट्युब्युल, सेलको एक भाग, ‘स्काफोल्डिङ’ वा ‘साइटोस्केलेन’ सँग सम्बन्धित भएको बताइएको छ । साइटोस्केलेटनले हाम्रो सेलको संरचना निर्धारित गर्नुका साथै शरीरमा तिनलाई परिचालन पनि गर्छ । सीएनएन

प्रतिक्रिया दिनुहोस